Олунньу 22 кунугэр Үлэ Кыһыл Знамята орден кавалера,Учууталлар учууталлара,Чурапчы,Кэбээйи улуустарын,Сииттэ нэһилиэгин бочуоттаах олохтооҕо,элбэх оҕо ийэтэ,эбээтэ,хос эбээтэ Мария Ивановна Колмогорова төрөөбүтэ 100 сылынан В.Е.Колмогоров аатынан Сииттэ орто оскуолатыгар тэрээһин ыытылынна.Бу тэрээһиҥҥэ оскуолабыт директора А.В.Новгородов бу дьоһун күнүнэн оҕолору,учууталлары эҕэрдэлээтэ уонна Мария Ивановна, Василий Егорович Колмогоровтар Сииттэ ,Кэбээйи оскуолаларыгар,ону сэргэ Мария Ивановна 2 Лүүчүн,Куокуй оскуолаларыгар таһаарыылаахтык үлэлээбитин билиһиннэрэн туран билиҥҥи ыччат оҕолор,учууталлар кинилэр учуутал,салайааччы,ийэ,аҕа быһыытынан баай опыттарын олоххо,үлэҕэ бэйэҕэ иҥэринэн кинилэр ааттарын өрүү үрдүктүк тутуохтаахпыт,өйдүү- саныы сылдьыахтаахпыт диэн эттэ. Аймахтар ааттарыттан оскуолабыт убаастанар учуутала О.Д.Левина оҕолорго туһулаан» Аймахтаргытын кытта билсиҥ» кинигэ биһигини барыбытын ситимниир,төрдү- ууһу кичэйэн үөрэтиҥ,үлэҕэ,үөрэххэ дьулуурдаах дьон буола улааталларыгар үөрэнээччилэргэ баҕа санаатын эттэ.
«Ситим» кыраайы үөрэтэр куруһуок салайааччылара Сивцева А. Л. уонна Яковлева М.А. Мария Ивановна олоҕун,үлэтин,бочуоттаах сынньалаҥҥа олорон суруйбут кинигэлэрин,улууска кыраайы үөрэтээччи Иванова Р.А.улуустааҕы «Светлая память об учителе» ыстатыйатын кылгастык билиһиннэрдилэр, Кэбээйи оскуолатыгар элбэх сыл завуһунан үлэлээбит,биир дойдулаахпыт Иванова Валентина Николаевна сахалыы ыстатыйата улуус хаһыатыгар тахсыахтааҕын туһунан кэпсээтилэр.9 кылаас үөрэнээччитэ Захарова Оля » Мин кыһыл көмүс кылаатым- оҕолорум» стендэни сиһилии кэпсээбитин үөрэнээччилэр интэриэһиргээн иһиттилэр.Бу кэнниттэн Мария Ивановна,Василий Егорович улахан уоллара,Бочуот Знага орден кавалера,М.К.Аммосов аатынан Государственнай премия лауреата,генерал — полковник Василий Васильевич Москваттан ыыппыт телеграммата,ону сэргэ Иван Васильевич Дьокуускайтан ыыппыт эҕэрдэ суруга ааҕыллыбытын учууталлар,үөрэнээччилэр истиҥник ылыммыттарын дохсун ытыс тыаһынан биллэрдилэр.Дьэ,ити курдук көлүөнэттэн көлүөнэлэр солбуллан иһиэхтэрэ, сыллар,хонуктар ааһыахтара, онтон үтүө дьон туһунан өйдөбүл өрүү тыыннаах буолуоҕа.

Пролистать наверх